Չմմառու մայրավանիքն մէջ Հոգեհանգստեան Պատարագ` Արցախի նահատակներուն
Յինանց շրջանի Աշխարհամատրան Կիրակի 10 Ապրիլ 2016-ին, աշխարհասփիւռ բոլոր հայկական եկեղեցիներուն մէջ մատուցուեցաւ Սուրբ և Անմահ Պատարագ ի հանգիստ Արցախի պաշտպանութեան համար զոհուած նահատակներու հոգիներուն: Զմմառու վանքի մայր տաճարին մէջ եւս Սուրբ և Անմահ Պատարագ մատուցեց դպրեվանքի փոխ տեսուչ՝ Գեր. Հ. Մաշտոց Վրդ. Զահթէրեան և հոգեհանգստեան յատուկ պաշտօն կատարեց ի յիշատակ Արցախ աշխարհի նահատակներուն: Արարողութեան իրենց մասնակցութիւնը բերին վանքի վարչական և միաբան Հայրերը, Ս. Միքայէլ և Երանելի Մալոյեան դպրեվանքերու ուսանողները, հաւատացեալներու բազմութիւնը և յատկապէս ՀԿՀՄ Հայ Կաթողիկէ Համալսարանական Միութեան անդամ անդամուհիները, որոնք ուխտեցին անգամ մը եւս հաղորդուելու նահատակներու կտակով և վերանորոգուելու քրիստոնէական հաւատքով: Ս. Պատարգի աւարտին՝ ՀԿՀՄ-ի երիտասարդ երիտասարդուհիները բարեսիրական գործ մը եւս կատարեցին, Զմմառու Հայ Քոյրերու «Նախախնամութեան Տան» որբուհիներուն կէսօրուայ ճաշը ապահովելով Հարիսայի գեղատեսիլ ճաշարանի մը մէջ:
| All the contents on this site are copyrighted ©. |